Joan den asteburuan izan da aurten antolatutako lehenengo mendi-irteera. Gogoratuko duzuen moduan (aurreko egunetan pasatu genizuen informazioa), Eibarko ikastetxeek Klub Deportiboarekin batera antolatzen dituzten mendi-irteerak dira, Iturburuko 3-6 maila bitarteko haurrentzat.

Aurreko urteetan ume kopurua pixkat jaitsi zen arren, aurten sekulako arrakasta izan du eta dagoeneko 60 umetik gora apuntatu dira irteeretarako joateko (urtean zehar 10 irteera inguru izango dira).  Angel Ibarluzea gurasoa da arduraduna, eta berekin batera beste 10 guraso ere apuntatu dira laguntzaile modura.

Lehenengo irteera asteburuan izan zen, eta gure seme-alabak perretxiko bila joan ziren mendira. Oso ondo pasatu zuten, eta igandean erakusketa polita egin zen kalean, jardunaldi mikologikoen barruan. Sariketa bat ere egon zen partaideen artean, ea nork perretxiko ezberdin gehiago batu, eta hementxe irabazleetako batzuk.

Hurrengo irteera datorren azaroaren 15ean izango da (igandea), Gazume mendira. Iturrioztik igo eta Errezilera jaitsita. Oso bide polita da.

Animatu! Ordura arte!