Aurtengo ikasturte hasieran erronka txiki bat hartu zuen Mogel Ikastolako Guraso Elkarteak: gurasoen arteko harremana sendotzea eta gure arteko komunikazioa (bai gurasoen artekoa, bai Elkarte barrukoa, zein Ikastolarekin daukaguna) ahal den neurrian hobetzea.

Gutxinaka-gutxinaka urratsak ematen joan gara. Lehenengo Guraso Elkartearen webgunea sortu genuen: MogelGE.com. Urtean zehar beste lantxo batzuk egiten ere joan gara. Eta, oraingoan, guraso guztiok jasoko dugun buletina jarri dugu martxan.

Ikasturtean zehar Ikastolako gurasoen e-mail helbideak jasotzen joan gara eta, hemendik aurrera, Guraso Elkartearen inguruko informazioa bide berri honen bidez jasoko dugu guztiok. MogelGE.com webgunean kaleratzen ditugun albiste guztiak ere, automatikoki, guraso guztiei bidaliko zaizkie.

Espero dugu, bide berri honekin, Guraso Elkartearen eta Ikastetxearen jarduera hobetuko dugula.

Eskerrik asko zuen laguntzagatik, eta edozein zalantza baduzue, Guraso Elkartean zure iradokizun, galdera eta eskaeren zain gaude.