Eibarko Udala eta Ipuruako Kiroldegiak egitasmo berri bat jarri nahi dute martxan. Udaletxetik ondorengo eskutitza bidali digute. Guztien interesekoa delakoan, hementxe duzue.

————

Eibarko kultura sailean, Ipuruako kiroldegikoaren laguntzaz, egitasmo berri bat nahi dugu jarri martxan. Udazken eta negu partean asteburuetan kiroldegiko kantxa bat umeak gurasoekin jolasteko gunea zabaltzean datza egitasmoa. Hasiera batean igandeekin probatuko da; ondo moldatuz gero zapatuetara ere zabalduko genuke.

Kantxa honetan umeek gurasoekin jolasteko aukera izango dute, ez da zaintza toki bat izango eta betebehar nabariena umea aita-amarekin egon beharko dela litzateke. Egitasmo hau aurrera eramateko gurasoen laguntza behar dugu. Kantxa debalde izango genuke baina kudeaketa gurasoen esku geratuko litzateke. Polikiroldegiko txartelik ez dutenek ere sartzeko aukera izango lukete sarrerarik ordaindu barik.

Beraz, ahalik eta guraso gehien behar dugu egitasmo honen kudeaketarako, hasiera batean igandetan 18:00etatik 20:00ak bitartean izango dena. Zenbat eta guraso gehiago laguntzeko prest egon ardura banatuagoa egongo litzateke.

Animatu zaitezte, aukera paregabea dugu neguan gure umeekin jolasgune itxi eta estali batean jolasteko. Egitasmoak ez du adin toperik baina batez ere haur hezkuntzako umeei zuzenduta egongo litzateke

Animatzen zaretenok, email honetara (gazteria@eibar.net) zuen izen-abizenak bidali eta baita helbide elektronikoa ere. Mila esker zuen laguntzarengatik eta posible baduzue zuen eskolako guraso elkartera edo gelako arduradunei pasatu lehen bait lehen aurtengo neguan ere zabaldu ahal izateko.

Eskerrik asko eta ondo izan,

Asier Lopez de Viñaspre
Haurreria eta gazteria Koordinatzailea
Eibarko Udala